هرجا که مو کُنُم رَو، یه دیوار نیامه
هر بال که مو اِکُنُم سِیل، تیا یار نیامه

وا عشقِ مو سردی نکّن، ای یارِ شِرینُم
بِل از سر و زلفِ تو هی، آستاره بِچینُم

چین چینِ پَلا رِحِدِه مِنه ری تو قشنگه
های گل، لَچَک و بندِ ریالی تو قشنگه

حَندِستنت ای گل، همه دنیانه ایَرزه
دل تا که اِبینه تُنه، چی بیدی اِلَرزه

هَمه مِنه تیات، جُوره یه ماهی کُنه بازی
گُهدُم تو اُوِیدی، همه دنیامه بسازی

روزی که تو رَهدی بَتَر از، شُوِه سیاهِه
اَفتو مِنِه مالُم دیه نیخوا بِدِراهِه

مِنه تیگِ مو چند ساله، که بخت تو نشسته
رَهدی غمه دیریه تو، رَهِ عشقُمه بسته

وُرگرد و بیو بی تو وُ، عشق تو مریضُم
اِخوم که زِ نوو، پای تو دنیامه بریزُم